KUVULWE ISIKHUNGO SOKUTHUTHUKISA INTSHA EMZUMBE
Bahamba phambili omasipala abayisithupha abangaphansi kwesifunda so’Gu ekusungulweni kwezikhungo ezibhekele
ukuthuthukisa intsha. Lokhu kuvezwe yilowo oyi Branch Manager kwi National Youth Development Agency esifundazweni
sakwaZulu Natali, uMnu Simphiwe Ntshweni, ngenkathi ethula inkulumo kuvulwa isikhungo sokuthuthukisa intsha,
esibizwa nge Youth Advisory Centre Point, kuMasipala waseMzumbe, O'gwini oluseNingizimu yesifundazwe,
ngoLwesibili
Umnu Ntshweni, uthe ziyishumi nesithupha kuphela izikhungo ezifuze lezi kuyo yonke ikwaZulu Natali, kanti
ezine kuzona zingaphansi kwamakolishi emfundo ephakeme (FET Colleges). "Ezikhungweni eziyishumi nambili
esezisungulwe ngaphansi koMasipala bakwaZulu Natali yonke, ziyisithupha ezingaphansi kwesifunda so'Gu,
lokhu okuyinkomba yokuzinikela koMasipala abangaphansi kwalesi sifunda ekubhekeleleni izidingo zentsha kule ndawo",
kuchaza uNtshweni
Ukwethulwa kwalesi sikhungo esidle isamba semali ebalelwa ku R200 000 kuMasipala waseMzumbe kuphela,
kuza emva kokuthi lo masipala usanda kuba undabamlonyeni ngokusungula isigungu esibhekela izidingo zetsha
esibizwa nge youth council, okuyisenzo esanconywa kakhulu umphakathi, ikakhulukazi itsha okuyiyona esithole
ithuba lokubeka uvo lwayo kulesi sigungu ngezinhlelo zentuthuko eziqondene nayo.
Ngenkathi amukela umphakathi kulo mcimbi, uMeya walo mkhandlu, u Khansela Sydney Gumede, uveze ukuthi lesi
sikhungo sinama computer azosiza intsha ikwazi ukufuna izikhala zemisebenzi ngaphandle kokukhokha ngisho isenti.
"Sinabasebenzi abaqeqeshiwe abasebenza kulesi sikhungo ukululeka intsha ngezemfundo, ezamabhizinisi, amathuba
emisebenzi nokunye okuningi", kubeka u Gumede.
Lesi sikhungo esakhiwe ngokuhlanganyela umasipala waseMzumbe, i-National Youth Development Agency, kanye nomasipala
wo'Gu, sesinesikhathi esingangonyaka sisebenza kulo Masipala kanti sekuvele ukuthi iningi lentsha yakulo
masipala seliyasisebenzisa ukwandisa ulwazi, nokuzithuthukisa ngezindlela ezahlukene.
Ongusihlalo wesigungu sentsha kulo masipala, uMnu Andile Gumbi, uncome kakhulu ukubambisana phakathi kwalo
masipala nezinhlaka eziqondene nokuthuthukisa intsha.
UGumbi uthe kuningi okuyimibono yentsha lo masipala osukwenzile kuhlanganisa ngisho nokushintshwa kophawu
lukamasipala okusanda kwenzeka kulo nyaka ophelile.
|